काठमाडौंको चावहिलस्थित सेन्ट लरेन्स कलेजका बीएसडब्ल्यू (स्नातक तह) उर्तीण विद्यार्थीहरूलाई जापानको एक प्रतिष्ठित सामाजिक संस्थामा रोजगारीको अवसर प्रदान गर्ने विषयमा सहकार्य सुरु भएको छ । यस सहकार्यका लागि जापानको सामाजिक संस्था ‘लाईफ स्टेज एनपिओ’ र सेन्ट लरेन्स कलेजबीच बिहिबार छलफल भएको हो । सो छलफलमा लाईफ स्टेज एनपिओका अध्यक्ष हिसोसी किसी खावा र कलेजका प्रमुख पुरुषोत्तम महर्जनबीच जापानमा ‘जव प्लेसमेन्ट’ का अवसर प्रदान गर्ने विषयमा सहमति भएको छ ।
प्रारम्भिक चरणमा सेन्ट लरेन्स कलेजका चार जना विद्यार्थीले यो अवसर पाउनेछन । आगामी दिनमा जापानको यो संस्थाको आवश्यकता अनुसार कलेजका अन्य विद्यार्थीहरूलाई पनि यस किसिमको अवसर प्रदान गर्ने संस्थाका अध्यक्ष खावाले जानकारी दिएका छन् ।
‘लाईफ स्टेज एनपिओ’ जापानभर २६ वटा शाखा भएको गैरसरकारी संस्था हो, जसले अटिज्म, मद्यपानसम्बन्धी समस्याहरू र अन्य सामाजिक सेवाका क्षेत्रमा सक्रिय रूपमा काम गर्दै आएको छ । सेन्ट लरेन्स कलेजले इच्छुक र योग्य विद्यार्थीहरूलाई उक्त संस्थासँग जोड्ने काम गर्नेछ भने संस्थाका प्रतिनिधिहरूले अन्तर्वार्ताद्वारा विद्यार्थीहरूलाई छनोट गरी जापानमा कामको अवसर दिने बताएका छन् ।
सो अवसरमा संस्थाका उपाध्यक्ष नाकानिसी काजुताका, श्रम व्यवस्थापन विभागका सदस्य अकिको आरारागी र किमियो मात्सुओ, तथा अन्तर्राष्ट्रिय श्रम व्यवस्थापन संयोजक सुजन प्रताप विवस सहभागी थिए । कलेजको भ्रमणपछि क्याम्पस प्रमुख महर्जनले संस्थाका अध्यक्ष खावालाई मायाको चिनोसमेत हस्तान्तरण गर्नुभएको थियो ।

कलेजका प्रमुख पुरुषोत्तम महर्जनले यस सहकार्यको बारेमा नयाँ पोस्टलाई जानकारी दिँदै भन्नुभयो–‘हाम्रो कलेजमा बिएसडब्ल्यू अध्ययन गरेका विद्यार्थीहरुई नेपालमा इन्टर्नसीप र जब प्लेसमेन्टका अवसरहरु खोज्ने काम त गरिरहेकै थियौं । नेपालमा विभिन्न १९ वटा संस्थाहरुमा इन्टर्नसिप र जव प्लेसमेन्टको काम भइरहेको छ । हाम्रो विद्यार्थीहरु अन्र्तराष्ट्रिय स्तरका सामाजिक संस्थामा पनि काम गर्न इच्छुक हुनुहुन्छ भने त्यस्ता विद्यार्थीहरुलाई लक्षित गरेर जापानको लाईफ स्टेज एनपिओ संस्थासँग सहकार्य थालेका छौं ।’
कलेजमा विद्यार्थीहरु र सो संस्थाका अध्यक्ष लगायत अरु पदाधिकारीसँग आज छलफल भएको उहाँले बताउँनुभयो । सो संस्थामा काम गर्न जानेबारे विद्यार्थीहरुले विभिन्न जिज्ञासा राखेका थिए ।
क्याम्पस प्रमुख महर्जनले भन्नुभयो–‘पढाइका क्रममा र इन्टर्नशीपको दौरान आफूले सिकेका अनुभव सुनाउँदै बिद्यार्थीले उत्सुकता देखाउँनुभएको छ भने ति विद्यार्थी मध्येबाट यो वर्ष ४ जना विद्यार्थीहरुलाई जापानमा जव प्लेसमेन्ट दिने भनेर उहाँहरुले जानकारी गराउँनुभएको छ । हाम्रो कलेजबाट विएसडब्ल्यू उर्तीर्ण गर्नुभएका विद्यार्थीहरुका लागि यो महत्वपूर्ण अवसर भएको हामीले ठानेका छौं । हामीले बिद्यार्थी भाइबहिनीहरुलाई एउटा बाटो देखाएका छौँ, उहाँहरु यसमा आफ्नो चाहना र रुची अनुसार निर्णय गरेर अघि बढ्न सक्नुहुन्छ ।’