१७ वैशाख, काठमाडौं । काठमाडौं महानगरपालिकाले मातहतका सबै निजी विद्यालयलाई जेठको पहिलो साताभित्र छात्रवृत्तिको विवरण तय गर्न निर्देशन दिएको छ।

महानगरको शिक्षा विभागले मंगलबार सूचना जारी गर्दै कक्षा १ देखि १० सम्म अध्ययनरत जेहेन्दार, विपन्न, अपाङ्ग, महिला, दलित, जनजाति, द्वन्द्वपीडित तथा शहीद परिवारका विद्यार्थीहरूलाई लक्षित गर्दै छात्रवृत्ति प्रदान गर्न विद्यालयहरूलाई निर्देशन दिएको हो।

निःशुल्क तथा अनिवार्य शिक्षा ऐन, २०५८ र काठमाडौं महानगर शिक्षा ऐन, २०६८ अनुसार, निजी विद्यालयहरूले आफ्ना कुल विद्यार्थी संख्या मध्ये कम्तीमा १० प्रतिशत विद्यार्थीलाई छात्रवृत्तिको सुविधा दिनुपर्ने व्यवस्था छ।

छात्रवृत्तिको छनोट प्रक्रिया पारदर्शी बनाउन विद्यालयस्तरमै समिति गठन गर्न भनिएको छ। उक्त समितिमा सम्बन्धित वडाका अध्यक्ष वा प्रतिनिधि, विद्यालयका प्रधानाध्यापक, महानगरको शिक्षा निरीक्षक, र विद्यालय व्यवस्थापन समितिका एक अभिभावक प्रतिनिधि रहनेछन्।

विद्यालयहरूले छात्रवृत्तिको विवरण महानगरको datacollection.kathmandu.gov.np वेबसाइटमार्फत पठाउनुपर्नेछ। साथै, विद्यालय परिसरमा सूचना टाँस गरी इच्छुक विद्यार्थी तथा अभिभावकले छात्रवृत्तिका लागि आवेदन दिन सक्ने वातावरण मिलाउन पनि महानगरले निर्देशन दिएको छ।